Johan Veenstra Books

Tijdens een reis door Egypte verwerkt een man twee ingrijpende gebeurtenissen.

Een meenske is gien eerpel is een Stellingwarver uutdrokking en et is ok de titel van al weer et veertiende boek van de Stellingwarver schriever Johan Veenstra. In dit boek schrift Johan Veenstra over de meerst uutienlopende meensken, in een bonte optocht trekken ze an oons veurbij. De schriever het de gaove om meensken goed in him op te nemen. Hij bekikt heur doen en laoten en geft ze op pepier weer zoas ze binnen, mit al heur brieke zetten en aeventuren. Een protte humor dus ok in dit boek, daor staot de schriever geraant veur, mar soms wodt et ok zomar evenpies hiel ontroerend. Een meenske is gien eerpel is een boek veur een groot lezerspebliek.

Een peer weken nao et wegraeken van zien moeder kwam Johan Veenstra eerst an de weet wie zien vader was en ontdekte hi'j dat hij een halfbreur hadde. Tien jaor laeter het hij dat gegeven verwarkt in zien vierde roman Een brogge van glas. Et boek begint as de schriever een brief an die onbekende breur schrift en de spannende vraoge is dan as en hoe daor op reageerd wodden zal. In tussentied beschrift Veenstra mit grote eupenhied fragmenten uut zien leven. Et opgruuien in een klein Stellingwarfs dörp daor alleman mekeer kende. Een dörp dat allange niet meer bestaot. Et verlangst naor genegenhied en geburgenhied, de tere dingen van et leven daor as niet over praot wodden kon. En... en liefde die geheim blieven moet. Mit Een brogge van glas het Johan Veenstra een indrokwekkend en ontroerend boek schreven dat ongetwiefeld op een protte lezers grote indrok maeken zal.

De wereld is gek is et negentiende boek van de Stellingwarver schriever Johan Veenstra. In de veertig verhaelen, die in dit boek staon, komt de humor riekelik an bod. Mar tussen alle verhaelen, daor aj' slim omme gniezen kunnen, staon ok een stokmennig ontroerende verhaelen. In poergeef Stellingwarfs lat Johan Veenstra oons et bijtieden zo wonderlike doen en laoten van de meensken zien. Hij het daor oge veur en de gaove om dat mit groot gevuul veur humor weer te geven. Wat inhoold en opzet anbelangt is De wereld is gek te beschouwen as de opvolger van Een meenske is gien eerpel, et boek van Johan Veenstra dat et vaekste herdrokt is. Krek as dat boek is De wereld is gek een anraoder. Et zal grif bij een groot lezerspebliek in de smaek valen!

De titel zegt et al: d'r gebeuren een protte wondere en wonderlike dingen in dit boek. Mar ok een protte humoristische, spannende, aeventuurlike en ontroerende dingen. Johan Veenstra schreef twintig nije volksverhaelen die heur overal in de Stellingwarven, in alderhaande dörpen, ofspeulen. Omdat d'rin verholing mar weinig oorspronkelike Stellingwarver volksverhaelen overleverd binnen, het Veenstra ze zels mar bedocht en opschreven. Et is een prachtig boek wodden in een schitterende, beeldende tael daor een grote lezerskring ongetwiefeld van genieten zai. Et iene verhael nao et aandere ziej as et waore veur je ogen gebeuren. Et verhael over dat boertien an et Wiede van de Lende dat zo graeg een jong en aeventuurlik wiefien hebben wol. En dat over die kerel uut Else die eins wel stomme graeg van zien vrouw of wol! De verhaelen over de mooie, jonge schipper van Wolvege de wite juffers van Schoterziel, de bakker van Oosterwoolde die zo graeg zooltene boonties iuste en de boer van Makkinge die zo graeg een sjees mit peerden hebben wol. En nog vule meer verhaelen over de deugden en de ondeugden van de Stellingwarvers.